(Christine Länger Kramer/Thürig)

S'isch Büroschluss, stahn uf de Strass
Es seicht wie blöd, ich wirde nass
Het Luscht jetzt no is Kino z'gah
Müesst vorher öppis z'Biisse ha.

Ich ränne schnäll zum Sternegrill
Will ich nur öppis Chlises will
S'hät Pommes, Hotdog isch egal
Mit Ketchup, Mayo frei nach Wahl

Au Döner, Nuggets, Pouletbei
Nur Früehligsrolle hätts ekei
Dä Fernseh lauft im Hintergrund
S'isch Meteo, wo jetzt grad chunt

Entscheid mi für än Cervelat
Das hani lang scho nümme gha
Dä letscht glaub i dä dritte Sek
Am offne Füür, am Spiess ufgsteckt

Nach paar Minute Schlange stah
Bstell ich mir Sänf und Cervelat
De Grilleur tuet als ghör er nüt
Luegt über d'Chöpf vo allne Lüüt

Dänn gaht er weg, laht mich lah stah
Luegt zrugg und seit no schnäll im Gaa
Hey sorry, Mann, ich chume grad
Äs gaht nöd lang, s'isch grad parat

Ich glaubs ja nöd, stier uf de Rost
Im Hindergrund, da raucht än Toast
Gseh unerreichbar und doch da
Än chnuschprig bruune Cervelat

Wo langsam schwarz wird, meh und meh
Es schellt mi schier, es tuet mer weh
Wo isch dä Typ, was isch passiert?
Dä Fernseh lauft, det wird grilliert!

Det brötlets Würscht bi Sunneschi
Det lacheds blöd und biissed drii
Und das, wo dete jetzt grad lauft
Wird mir als wahri Wält verchauft

Min Appetit isch furt und wägg
Und alls nu wäg dem blöde Depp
Min Traum, dä lit vercholet da
En rabeschwarze Cervelat

Furt isch (au) mini Kino-Luscht
S'bliibt nur (de) Ärger, Wuet und Fruscht
Stahn ohni Wurscht jetzt uf de Strass
Es seicht wie blöd, ich wirde nass

Ich laufe los, und lueg nöd zrugg
Gang über's Bellevue und uf d'Brugg
Da ghöri luut es Martinshorn
Und Stimme: "Lueg, es brännt det vorn!"

Im Rugge gspüri scho chli d'Hitz
Dänn en Dunner und en Blitz
Und plötzli isch es gspängschtisch still
Ich hoff, es brännt am Sternegrill