Ferie

(Kramer-Länger/Schindler)

S' Bett isch z'hërt
Oder z'weich je nach dem
Oder es isch so-n-e typpischi Badwanne

Uf all Fäll schlafsch eh nie würkli guet
Uf all Fäll nie guet y
Und verwachsch x-mal z'Nacht
Und dänn merksch ebe

S' Bett isch z'hert
Oder z'weich je nach dem
Oder es isch so-n-e typpischi Badwanne

Und wänn d'dänn wotsch go tusche
Am Morge zum die schlächt Nacht abwäsche
Dänn merksch dass z'wenig Wasser chunt

Und dänn isch es ersch na nöd richtig warm
Oder nöd richtig chalt – je nach dem
Und schmöckt nach Chlor oder so
Das's klar isch, trinke chasch das eh nöd
Und zum Zähbutze muesch Mineralwasser näh
Wo d' zersch muesch go poschte

Und dänn machsch di halt untuschet und mit unputzte Zäh uf de Wäg

Und wänn'd dänn wotsch go tusche
Am Aabig nachdem d'Zäh putzt häsch mit Mineralwasser
Dänn merksch ebe dass z'wenig Wasser chunt

Und dänn frögsch di

Worum gömmer i d'Ferie
Dihei wär doch alls so bequem
Und bekannt und s'chäm eim nüt quer ie
Es wär eifach und passend und schön

Und immer muesch umrächne
Vo Euro oder so in Franke – je nach dem
Und meinsch immer s'seg günschtiger als dihei
Was überhaupt nöd schtimmt

Und chunsch eh nie gnau das über wo d' eigentli wetsch
Oder bruuchsch
Obwohl's eigentli fängs überall s'Glych git
Nöd emal s'Mineralwasser schmöckt we dehei

Und dänn muesch frööge
Und chunsch prompt en Antwort über
Wo'd nöd gnau verschtahsch
Und drum chaufsch es dänn halt glych

Und bim Zale musch dänn ebe umrächne
Vo Euro oder so in Franke – je nach dem
Und meinsch immer s'seg günschtiger als dihei
Was überhaupt nöd schtimmt

Und dänn frögsch di

Refrain

Und irgendwänn lysch wider i dym eigete Bett
Wo genau richtig hert isch oder weich – je nach dem

Und am Morge bim Tusche
Chunt genau so vill Wasser wi d'wotsch
Und so warm oder chalt – je nach dem – wie d'ygschtellt häsch
Und s'schmöckt genau so we Wasser ebe schmöckt

Und bim Poschte findsch alls im Gschtell wie immer
Und bim Zahle känsch s'Münz scho bim Aalange a der Grössi
Und d'Nöötli vo wytem a der Farb

Und alls isch der total klar und bekannt
Und du känsch alls wie im Schlaf
I dym Bett, dym eigete
Wo ebe gnau richtig richtig hert isch oder weich, je nach dem

Und dänn weisch

Drum gömmer i d'Ferie
Dihei wär doch alls nur bequem
Und bekannt und s'chäm eim nüt quer ie
Es wär nur eifach und passend und …

… s'nächst mal nimi im Fall s' Hirsechüsseli mit
und e Bettfläsche…